მაიკ რობინსონი: რა იცით, რომ ცხოველებს სული აქვთ?
შრილა პრაბჰუპადა: ამას თქვენც მიხვდებით. აი, ამის მეცნიერული მტკიცება: ცხოველი ჭამს, თქვენც ჭამთ; ცხოველს ძინავს, თქვენც გძინავთ; ცხოველს გააჩნია სექსი, თქვენც გაგაჩნიათ სექსი; ცხოველი თავს იცავს, თქვენც თავს იცავთ. მაშ, რაღა განსხვავებაა თქვენსა და ცხოველს შორის? როგორ შეგიძლიათ იმის თქმა, რომ თქვენ გაქვთ სული, ცხოველს კი – არა? მაიკ რობინსონი: ჩემთვის სავსებით გასაგებია. მაგრამ ქრისტიანული წმინდა წერილების თანახმად… შრილა პრაბჰუპადა: თავი გაანებეთ წმინდა წერილებს; ეს ელემენტარული მსჯელობის საკითხია. შეეცადეთ გაიგოთ. ცხოველი ჭამს, თქვენც ჭამთ; ცხოველს ძინავს, თქვენც გძინავთ; ცხოველი თავს იცავს, თქვენც თავს იცავთ; ცხოველი მრავლდება, თქვენც მრავლდებით; ცხოველებს ჰყავთ შვილები, თქვენც გყავთ შვილები; მათ აქვთ საცხოვრებელი ადგილი, თქვენც გაქვთ საცხოვრებელი ადგილი. ცხოველს ჭრილობა რომ მიაყენოთ, სისხლი გამოვა; თქვენ რომ ჭრილობა მოგაყენოთ, სისხლი დაიღვრება. ასე რომ, ყველაფერი ერთნაირია. მაშ, რაღად უარყოფთ მხოლოდ ამ ერთ მსგავსებას – სულის არსებობას? ეს არალოგიკურია. გისწავლიათ ლოგიკა? ლოგიკაში არის ერთი რამ, რასაც ანალოგია ეწოდება. ანალოგია ნიშნავს დასკვნის გამოტანას მრავალი მსგავსების მიგნების საფუძველზე. როდესაც ადამიანებსა და ცხოველებს შორის ამდენი მსგავსება არსებობს, რატომ უნდა უარვყოთ ეს ერთი მსგავსება? ეს არ არის ლოგიკური. ეს არ არის მეცნიერება. მაიკ რობინსონი: მაგრამ თუ ჩვენ ამ არგუმენტს სხვაგვარად გამოვიყენებთ… შრილა პრაბჰუპადა: აქ სხვა გზა არ არსებობს. თუ თქვენი მსჯელობა ლოგიკას არ ეყრდნობა, გონიერად ვერ ჩაითვლებით.
მეცნიერება თვითრეალიზაციის შესახებ – ა.ჩ. ბჰაქტივედანტა სვამი პრაბჰუპადა
